MODDIY NUQTA DINAMIKASI. Ma’ruza rejasi: Moddiy nuqta dinamikasi.Dinamikaning vazifasi. Nyuton qonunlarining zamonaviy talqin etilishi. Nyutonning birinchi qonuni. Nyutonning ikkinchi qonuni va xarakat tenglamasi. Impuls. Kuch- impulsdan vaqt bo‘yicha olingan birinchi tartibli xosilasi. Nyutonning uchinchi qonuni. Jism tezlanishini yuzaga keltiruvchi sabablarni va uning harakatini shu sabablar bilan bog‘lanishini o‘rganuvchi mexanikaning bo‘limiga dinamika deb ataladi. Biz o‘tgan mexanikaning kinematika qismida jismlarning ya’ni moddiy nuqtalarning harakatini, bu harakatni keltirib chiqargan sabablarga bog‘lamasdan o‘rgangan edik. Mexanikaning dinamika qismida esa jismlarni harakatga keltirgan kuchlar bilan bog‘liq holda o‘rganamiz. Dinamikaning vazifasi asosan ikki qismdan iborat: 1) jism harakati ma’lum bo‘lsa, unga ta’sir etuvchi kuchni aniqlash; 2) jismga ta’sir etuvchi kuch ma’lum bo‘lgan holda harakat qonunini aniqlashdan iborat. Dinamikaning asosini Nyuton qonunlari tashkil etadi. Nyuton o‘zidan oldin yashab o‘tgan olimlarning tajribalarini va ma’lumotlari tahlil qilib dinamikaning asosiy uchta qonunini yaratdi. Nyutonning birinchi qonuni quyidagicha ta’riflanadi: har qanday jism tinch yoki to‘g‘ri chiziqli tekis harakati holatini bu jismga boshqa jismlar ta’sir qilmaguncha saqlaydi. Jismlar o‘zlarining tinch yoki to‘g‘ri chiziqli tekis harakatini saqlash qobiliyatiga inertsiya deb ataladi. Inertsiya materiyaning umumiy xususiyatlaridan biridir. Nyutonning birinchi qonuni inertsiya qonuni deb ham ataladi. Inertsiyaning namoyon bo‘lishiga biz hayotimizda juda ko‘p bor duch kelamiz. Masalan, harakatlanayotgan avtobusning tezligi birdan o‘zgarganda yo‘lovchilar dastlabki holatlarini saqlagan holda, agar tezlik kamaysa–oldinga, tezlik ortsa – orqaga og‘adilar. 1-Rasm. Nyutonning birin chi qonuni har qanday sanoq sistemasida ham bajarilavermaydi. Bir–biriga nisbatan biror tezlanish bilan harakatlanayotgan ikki sanoq sistemasiga nisbatan jismning holatini kuzataylik. Agar jism ulardan biriga nisbatan tinch turgan bo‘lsa, ikinchisiga nisbatan u tezlanish bilan harakatlanadi. Demak, bir vaqtning o‘zida Nyutonnning birinchi qonuni ikkala sistemaning qanoatlantirishi mumkin emas. Berilgan sanoq sistemasida Nyutonning birinchi qonuni bajarilsa, bu sistemani inertsial sanoq sistemasi deyiladi. Nyuton qonuni bajarilmaydigan sanoq sistemasiga noinertsial sanoq sistemasi deb ataladi. Jismlar yoki ularning zarralari orasidagi ta’sirlashuvni yo‘nalish va miqdor jihatdan ifodalovchi vektor kattalikka kuch deb ataladi. Jism o‘z harakatini o‘zgartirmaslikka yoki uning o‘z holatini saqlash xossasi uning inertligini belgilaydi. Inertlik o‘lchovi sifatida massa olinadi. Moddiy nuqta mexanik harakatini tashqi kuchlar ta’sirida qanday o‘zgarishi dinamikaning asosiy ikkinchi qonunida bayon etiladi.