OMMAVIY XIZMAT 1. Ommaviy xizmatlarning huquqiy tabiati. 2. Ommaviy xizmatlarni taqdim etuvchi tuzilmalar. 3. Ommaviy xizmatlar turlari. 4. Ommaviy xizmatlar ko‘rsatish tartib-taomillari. 5. O‘zbekiston Respublikasida ommaviy xizmatlar institutini shakllantirish. 6. O‘zbekiston Respublikasida 2020-2025-yillarda “Elektron hukumat” tiziminining konseptual asosi. Ommaviy xizmatlarning huquqiy tabiati Ommaviy xizmat tushunchasi davlat xizmatlari tushunchasiga nisbatan kengroq tushuncha hisoblanadi va o‘z ichiga davlat xizmatlari tushunchasini ham qamrab oladi: ommaviy xizmat davlat organlari va ommaviy-huquqiy faoliyat sohasida vakolat berilgan nodavlat tuzilmalar tomonidan ko‘rsatiladi; davlat xizmati davlat organlari tomonidan ko‘rsatiladi. Davlat xizmati tushunchasiga normativ huquqiy-hujjatlarda quyidagicha ta’rif beriladi: davlat xizmati — ariza beruvchilarning so‘rovlariga ko‘ra amalga oshiriladigan, davlat organlarining vazifalarini bajarish bo‘yicha ular tomonidan ko‘rsatiladigan xizmat. Agar qonun hujjatlariga muvofiq davlat xizmatlari ko‘rsatish funktsiyalari boshqa tashkilotlar zimmasiga yuklatilgan bo‘lsa, ular ham davlat xizmatini ko‘rsatishlari mumkin (O‘zbekiston Respublikasining “Elektron hukumat to‘g‘risida”gi qonuni, 3-modda); elektron davlat xizmati — axborot-kommunikatsiya texnologiyalaridan foydalanilgan holda elektron shaklda ko‘rsatiladigan davlat xizmati (O‘zbekiston Respublikasi Vazirlar Mahkamasining O‘zbekiston Respublikasi YAgona interaktiv davlat xizmatlari portali orqali elektron davlat xizmatlari ko‘rsatish tartibini takomillashtirish chora-tadbirlari to‘g‘risidagi qarori). Ommaviy xizmatlarni taqdim etuvchi tuzilmalar O‘zbekiston Respublikasi Prezidentining 2017-yil 12-dekabrdagi PF-5278-son «Aholiga davlat xizmatlari ko‘rsatishning milliy tizimini tubdan isloh qilish chora- tadbirlari to‘g‘risida»gi Farmoniga muvofiq O‘zbekiston Respublikasi Adliya vazirligi hamda O‘zbekiston Respublikasi Prezidenti huzuridagi Loyiha boshqaruvi milliy agentligi qarori bilan Davlat xizmatlari yagona reyestri tasdiqlangan bo‘lib unga ko‘ra 80 ta ma’muriy organ tomonidan ko‘rsatiladigan 700 dan ortiq davlat xizmatlarining turlari keltirilgan. Ommaviy xizmatlar ko‘rsatish tartib-taomillari Davlat xizmatlarini ko‘rsatish faoliyati ma’muriy reglamentlar asosida tartibga solinadi. Masalan: • Ichki ishlar organlari sohasida davlat xizmatlari ko‘rsatishning ayrim ma’muriy reglamentlarini tasdiqlash to‘g‘risida (04.10.2018 yildagi VMQ 797-son) • Arxitektura va qurilish sohasida davlat xizmatlari ko‘rsatishning ayrim ma’muriy reglamentlarini tasdiqlash to‘g‘risida (18.05.2018 yildagi VMQ 370-son) • Aholini ijtimoiy himoya qilish sohasida davlat xizmatlari ko‘rsatishning ayrim ma’muriy reglamentlarini tasdiqlash to‘g‘risida (23.05.2020 yildagi VMQ 327-son) • Kadastr sohasida ayrim davlat xizmatlari ko‘rsatishning ma’muriy reglamentlarini tasdiqlash to‘g‘risida (02.09.2020 yildagi VMQ 535-son) • Sport-ta’lim muassasalarining trener-o‘qituvchilari va yo‘riqchi- uslubchilariga malaka toifalarini berish bo‘yicha davlat xizmatlari ko‘rsatishning ma’muriy reglamentini tasdiqlash to‘g‘risida (03.03.2020 yildagi VMQ 118-son) • Bolalarni davlat umumiy o‘rta ta’lim muassasalariga qabul qilish bo‘yicha davlat xizmatlari ko‘rsatishning ma’muriy reglamentini tasdiqlash to‘g‘risida (07.06.2019 yildagi VMQ 469-son) O‘zbekiston Respublikasi Prezidentining 11.04.2018 yildagi PQ-3662-son, Davlat xizmatlari ko‘rsatish tizimini jadal rivojlantirish bo‘yicha qo‘shimcha chora- tadbirlar to‘g‘risida Qarorida 2017 — 2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasi va O‘zbekiston Respublikasida Ma’muriy islohotlar amalga oshirish, shuningdek, aholiga davlat xizmatlari ko‘rsatish milliy tizimining sifat jihatidan yangi darajaga o‘tishini ta’minlash maqsadida davlat xizmatlari ko‘rsatish milliy tizimini tubdan isloh qilishning eng muhim yo‘nalishlari sifatida quyidagilar belgilangan: birinchidan, davlat xizmatlari ko‘rsatish sohasida ularning sifati, tezkorligi, shaffofligi va foydalanish imkoniyatini tubdan oshirish orqali «Xalq davlat idoralariga emas, davlat idoralari xalqimizga xizmat qilishi kerak» degan ulug‘vor g‘oyani so‘zsiz amalga oshirish; ikkinchidan, Tadbirkorlik subyektlariga «yagona darcha» tamoyili bo‘yicha davlat xizmatlari ko‘rsatish yagona markazlarini ham yuridik, ham jismoniy shaxslarga «yagona darcha» tamoyili bo‘yicha xizmatlarni taqdim qiluvchi Davlat xizmatlari markazlariga o‘zgartirish; uchinchidan, davlat xizmatlarining har bir turi bo‘yicha «Fuqarolar emas, hujjatlar harakatlanadi» tamoyiliga ko‘ra davlat xizmatlari ko‘rsatish mexanizmini, eng avvalo, ortiqcha tartib-taomillarni bartaraf etish, vakolatli davlat organlari va boshqa tashkilotlar zarur hujjatlar va axborotlarni boshqa tuzilmalardan mustaqil ravishda olishi hisobiga soddalashtirishni nazarda tutuvchi ma’muriy reglamentlarni tasdiqlash; to‘rtinchidan, davlat xizmatlari ko‘rsatish sohasiga innovatsion echimlar va axborot-kommunikatsiya texnologiyalarini jadal joriy etish, davlat organlari va boshqa tashkilotlarning ma’lumotlar bazalarini idoralararo elektron hamkorlik yagona tizimiga integratsiya qilish, O‘zbekiston Respublikasi YAgona interaktiv davlat xizmatlari portali orqali davlat xizmatlari ko‘rsatish amaliyotini kengaytirish;