O‘QUV-DIDAKTIK TAHLIL REJA: 1. O’quv tahlili, uning maqsad va vazifalari. 2. Didaktik tahlilga xos asosiy xususiyatlar va tamoyillar. 3. O’quv tahlilda matn, yozuvchi va o’qituvchi munosabatlari. 4. O’quvchi va o’qituvchining didaktik tahlilda ishtirok etishi. 5. O‘quv tahlilida savol va topshiriqlarning ahamiyati. Tayanch tushunchalar: O’quv tahlil , Tahlilning yo’naltirilganligi , Didaktik tahlil qatnashchilari , Tahlil qatnashchilarining o’zaro munosabatlari, O’quv tahlili-kashfiyot, Didaktik tahlilning vaqt, joy va qatnashchilarning tayyorgarlik darajasiga ko’ra cheklanishlari. Zaruriy adabiyotlar ro’yxati: 1. Q. Yo‘ldoshev, M. Yo‘ldosheva. Badiiy tahlil asoslari. O‘quv qo‘llanma. T. Kamalak. 2016. 2.Karimov B. Ruhiyat alifbosi. – T.: G‘.G‘ulom nimidagi nashryot matbaa-ijodiy uyi , 2018. 3. M. Abdiev, H. Berdiev. Tahliliy o’qish. – Samarqand: 2009 yil 4. M. Qo’shjonov. Ma’no va mezon. – Toshkent: 1974 yil 5. V. Belinskiy. Adabiy orzular. – Toshkent: 1977 yil 6. U. Normatov. Talant tarbiyasi. – Toshkent: 1980 yil 7. Q. Yo’ldoshev. Yoniq so’z. – Toshkent: 2006 yil Didaktik tahlilni uyushtirishning nazariy asoslarini belgilashdan oldin o’quv tahlilning ilmiy tahlildan farqini aniqlab olish zarur bo’ladi. Aslida, didaktik tahlil ham badiiy matnning sirini kashf etishga, muallifning niyatini anglashga, asar jozibasini ta'minlaydigan jihatlarni aniqlashga qaratilgan faoliyatdir. O’quv tahlili bir qator qirralari bilan filologik tahlildan muayyan darajada farq qilsa-da, unga zid narsa emas. Har qanday didaktik tahlil ilmiy tahlil darajasiga ko’tarilishga intiladi va unga yetganda o’quv tahlilidan ko’zda tutilgan maqsadga to’liq erishilgan bo’ladi. Ayni vaqtda, badiiy asarni didaktik tahlil qilish filologik tahlil etishdan jiddiy farq ham qiladi. O’quv tahlili ilmiy tahlil singari faqat ilmiy-estetik faoliyat bo’lib qolmay, balki pedagogik-psixologik jarayon hamdir. Chunki pedagogik maqsadga yo’naltirilganlik didaktik tahlilning asosiy belgisidir. Agar filologik tahlil, asosan, faqat olimning aqliy faoliyati natijasi bo’lsa, o’quv tahlili o’qituvchining talabalar bilan bevosita muloqoti mobaynida amalga oshiriladigan tadbirdir. Didaktik tahlilning ishtirokchilari ko’proq bo’lishadi va barcha aqliy- estetik operatsiyalar qatnashchilarning imkoniyatlari va saviyalariga moslashtirilgan holda bajariladi. O’quv tahlilidan maqsad badiiy asarni to’gri qabul etish orqali o’quvchilarda shaxslik sifatlarini shakllantirishdan iboratdir. Didaktik tahlilning vazifalari badiiy asarning o’ziga xosligi, jozibasi va ta'sir qilish sabablarini aniqlash orqali talabalarda ta'sirchan qalb, xassos tuyg‘ular, sog‘lom estetik did, ravon va ifodali nutq shakllantirishdan iboratdir. Shunga ko’ra o’quv tahliliga badiiy asar matnining hayotiy va badiiy mantig‘i hamda estetik jozibasini kashf etish orqali tarbiyalanuvchilarda komil insonga xos ma'naviy belgilarni shakllantirishga qaratilgan ilmiy pedagogik faoliyat tarzida ta'rif berish mumkin. O’quv tahlili ko’proq shaxslik xususiyatiga tayanadi, chunki u jonli shaxslar ishtirokida amalga oshiriladi va tahlil qatnashchilarida muayyan fazilatlarini dunyoga keltirishga yo’naltiriladi. Buning uchun didaktik tahlilda o’quvchilarning hissiyotlar olamiga ta'sir ko’rsatish kerak bo’ladi. O’quvchilar hissiyotlariga daxl qilmagan har qanday narsaga loqayd bo’lishadi. Talabalarning hissiyotiga ta'sir qilingandagina bolalar asar ichiga "kirishadi", asar qahramonlari bilan birga "yashay" boshlashadi. Hissiyotga tayanib qilingan tahlil tufayli o’quvchilar badiiy matnga ruhoniy ko’z bilan qaraydigan bo’lishadi. Ular oddiy yozuv belgilari zamiriga ulkan insoniy taqdirlar, ta'sirchan tuyg‘ular, hadsiz fojia va quvonchlar yashiringanligini his etishadi, ularni kashf etishadi. Kashf etish esa, rivojlanishning yangi bosqichlari sari undaydi. Didaktik tahlil ilmiy tahlildan farq qilib, mantiqiy sillogizmlarning o’zigagina tayana olmaydi. Negaki, o’quv tahlilida hamisha konkret yoshdagi, muayyan sinfdagi o’ziga yarasha hayotiy tajriba va bilimga ega bo’lgan o’quvchilar bilan muayyan vaqt mobaynida ish ko’riladi. Ilmiy tahlilda esa tahlilchi bu xildagi cheklashni hisobga olmaydi. Buning ustiga, o’quv tahlili vaqt jihatidan ham cheklangan bo’ladi va tahlil doimo bir dars mobaynida amalga oshirilishi lozim estetik-mantiqiy operatsiyalardan iborat bo’ladi. Shu ma'noda, o’quv tahlili pedagogik jarayonning uzviy bir bo’lagi hisoblanadi. Badiiy asarning cheklanmagan, adog‘i yo’q go‘zalligi bilan ish ko’rayotgan adabiyotchi o’quvchilardagi aqliy va hissiy imkoniyatlar cheklanganligi, muayyan asarni o’rganishga ajratligan vaqtning chegaralanganligi bilan hamisha hisoblashishga majbur bo’ladi. Badiiy asarni didaktik tahlil etish jarayonida o’qituvchi va o’quvchi faoliyati uch yo‘nalishda uyushtirilishi mumkin. Bu hol o’quv tahlilining uch turini keltirib chiqaradi. Birinchi yo‘nalishda adabiyot o’qituvchisi faqat badiiy matnga suyanadi va uning ichki tartibiga daxl qilmagan, uni o’zgartirmagan holda asar zimnidagi ma'noni, jozibani o’quvchilarga ko’rsata boradi. Bu yo‘nalish tekstual tahlil deyiladi va bunda o’qituvchi ko’proq faoliyat ko’rsatadi. Ikkinchi yo‘nalishda o’qituvchining e'tibori asardagi personajlarga qaratiladi va badiiy ma'no obrazlar ruhiyatini anglab borish jarayonida tabiiy ravishda kelib chiqadi. Yozuvchining san'atkorlik mahorati ham badiiy obrazlarning qanchalik jonli va ta'sirchan ishlanganligini idrok qilish asnosida ochib boriladi. Bu yo‘nalish timsolli tahlil deyiladi va unda o’quvchilarning ham faol ishtirok etishlariga imkoniyat bo’ladi. Uchinchi yo‘nalishda esa tahlil asosan o’quvchilar tomonidan olib borilishi ko’zda tutiladi. O’qituvchi talabalari oldiga muammo qo’yadi va ularni bu muammoni yechishga yo’llaydi. Asar tahlili jarayonida o’quvchilar faqat oldin o’zlashtirgan bilimlaridan foydalanibgina qolmay, bir qator yangi estetik-mantiqiy tushunchalarni o’zlashtirib ham oladilar. Negaki, ular o’zaro fikr almashadilar, bahslashadilar. Tabiiyki, bu jarayonda o’quvchilarning ma'naviy olamida ham, aqliy dunyosida ham muayyan o’zgarishlar sodir bo’ladi. O’quv tahlilining bu yo’nalishi muammoli tahlil deyiladi. Tahlilning yo’nalishlari bir-birini inkor qilmaydi. Adabiy ta'lim amaliyotida tahlilning uch yo’nalishi deyarli hamisha aralash, qorishiq holda keladi. Tekstual tahlilni obrazlarga tayanmay turib amalga oshirib bo’lmaydi. Muammoli tahlilni ham badiiy matnga asoslanmay bajarish mumkin emas. Har qanday muammo matndan kelib chiqishi, har qanday mustaqil fikr ham matnning sehr-u jozibasini ochishga xizmat qilishi joiz. Tekstual tahlilda matnning maromini buzmaslik, muallif yurgan yo’lga, u o’rnatgan badiiy tartibga rioya qilish ustuvor bo’ladi, lekin tahlilning qolgan ikki turida ham badiiy matn asosiy o’rin tutadi. Shu ma'noda, har qanday tahlil mohiyat e'tibori bilan tekstual tahlildir. Chunki badiiy asar yuzasidan amalga oshiriladigan har qanday faoliyat faqat matnga tayanishi, matndan kelib chiqishi, matnning jozibasini ochishga xizmat qilishi lozim. Shuning uchun ham har qanday yo’nalishdagi o’quv tahlilini amalga oshirishdan oldin, albatta, o’quvchilar badiiy matn bilan yaxshi tanish bo’lishlari shart. Tekstual tahlil, ayniqsa, kichikroq hajmli nasriy asarlarni didaktik tahlil etishda juda qo’l keladi. Katta hajmli epik asarlarni o’rgatishda timsolli tahlil usulidan foydalanish yaxshi samara beradi. Timsollarning o’quvchilar tomonidan jonli odamlar, o’z taqdiriga xos insoniy tabiatga ega tirik kishilar tarzida qabul etishga erishish kerak.Shundagina, bu timsollar tuygan tuyg‘ular o’quvchilarga ham yuqadi, ta'sirlantiradi, binobarin, tarbiyalaydi. O’quvchilarning badiiy timsollarni darhol ijobiy va salbiy guruhlarga ajratishlariga yo’l qo’ymaslik, har bir badiiy timsolning qarama-qarshi tabiatli kishi nuqtai nazaridan qanday baholanishi mumkinligiga e'tibor qaratilishi lozim. Hayotdagi odamlarni jo’ngina yaxshi va yomonga ajratish noto’gri bo’lganidek, badiiy timsollarni ham ijobiy va salbiyga ajratib tashlash to’gri emasligi o’quvchilar ongiga singdirilishi zarur. Hayotdagi har bir alohida odam yechimi topilishi mumkin bo’lmagan muammodir. Badiiy adabiyot ana shu adoqsiz muammoning qirralirini butun murakkabligi, jilvalari, soyalari va tovlanishlari bilan tasvir etish orqali o’quvchini o’zgani his etishga, o’ziga bevosita daxli bo’lmagan begona kimsaning dardini anglashga odatlantiradi. O’z tabiati yo’nalishi va adabiy ta'lim qo’ygan vazifaning xarakteriga qarab, timsoliy tahlil natijasida har bir o’quvchi ruhiyatida muayyan sifatlar hosil bo’ladi. Badiiy asar muammoli tahlil etilganda, o’quvchilar badiiy va hayotiy muammoni o’z tushuncha va tajribalaridan kelib chiqib hal etishga o’rganishadi. Muammoli tahlil puxta bo’lishi uchun o’quvchilar badiiy matn bilan yaxshi tanishibgina qolmay, uni to’liq hazm qilgan bo’lishlari ham kerak. Chunki o’zlashtirilgan fikr fikr uyg‘otadi, singdirilgan hissiyot tuyg‘u qo’zgatadi. Muammoli usul bilan tahlil etishda o’quvchilarni shunchaki bahsga tortish kerak emas, balki ularning butun kuchi badiiy matnning magzini ochishga yo’naltirilgan bo’lishi lozim. Muammoli tahlil kutilgan samarani berish uchun matnga o’quvchilar hayotiy tajribalari va egallagan bilimlari darajasidan kelib chiqib erkin yondasha olishlari zarur. Misol uchun, Sofoklning "Shoh Edip" asari muammoli yo’l bilan tahlil etiladigan bo’lsa, oqituvchi : "Edip gunohkormi?" tarzida savol qo’yishi va o’quvchilardan o’z fikrlarini faqat badiiy matnga tayangan holdagina asoslashlarini talab etishi mumkin. Gunoh, gunohkorlik, ayb va aybdorlik, qismat, inson ma'naviyati singari tushunchalar atrofida fikr yuritish jarayonida o’quvchilar Edip shaxsining ulkan fojiasini yaqindan, bevosita his etadilar. Didaktik tahlilga tayyorgarlik va amalga oshirish har bir adabiyot o’qituvchisi uchun doim ham ikki bosqichli jarayon hisoblanadi. Birinchi bosqich o’qituvchining darsga tayorlanish jarayoni bo’lib, bunda o‘rganiladigan asar o’zicha tahlil etiladiki, buni muallimning individual tahlili deyish mumkin. Ikkinchi bosqichda esa, o’qituvchi va o’quvchilar hamkorligida muayyan asar tahlil qilinadiki, uni o’quvchilar yordamida tahlillash deyish mumkin. Aslida, bu ikki bosqich bir jarayonning turli sharoitlardagi ko’rinishlari va shu bois bir-biriga aslo zid emas. Lekin ayni vaqtda, bu ikki faoliyat turini farqlamaslikni ham to’gri deb bo’lmaydi. Negaki, o’qituvchi badiiy asar bilan yolg‘iz uchrashganda, uni xayolan didaktik tahlil qilganda, ertangi pedagogik vaziyatni, o’quvchilar hissiyotining namoyon bo’lish tarzini, o’zining kayfiyatini oldindan to’liq bilishi mumkin emas. Binobarin, jamoaviy tahlil jarayonida individual tahlilning ayrim qirralariga muayyan tahrirlar kiritilishi, ayrim jihatlarga ko’proq e'tibor qaratilishi, o’quvchilarda ijobiy tuygular uyg‘otadigan o’rinlarga urg‘u berilishi, ekspromlar qilinishi tabiiydir.Chunki adabiyot darsi- ijod. Ijodda esa hamma narsani oldindan to’liq rejalashtirib bo’lmaydi. To’liq rejaga tushgan faoliyat ijod bo’la olmaydi. Shu bois adabiyot o’qituvchisi topqir, hozirjavob, har qanday vaziyatdan chiqib keta oladigan, ayni vaqtda, badiiy asarning estetik ma'nosini nazardan qochirmaydigan shaxs bo’lishi lozim. Adabiy ta'limidagi eng jiddiy qusurlardan biri shundaki, o’qituvchilar o’rganiladigan badiiy asarni oldin individual tahlil etishga yetarli e'tibor bermaydilar. Natijada, o’qituvchi frontal (ommaviy) tahlil jarayonida muhim badiiy unsurni nomuhimdan ajratishga o’lgurolmay qoladi. O’quvchilarda esa bunday ko’nikma hali shakllanmaganligi uchun asar zamiridagi badiiy estetik ma'no payqalmay qolib ketishi mumkin. Bunday bo’lmasligi uchun o’qituvchi individual tahlildan erinmasligi, tahlil jarayonida talabalarning hissiyotlarini uyg‘otadigan, ularda ezgu ma'naviy sifatlar paydo qilishi mumkin bo’lgan holatlarni hosil qilish yo’llarini oldindan rejalashtirishi kerak. Didaktik tahlil o’quvchilarning ishtirok etishlariga ko’ra: individual, guruhiy hamda ommaviy singari turlarga ajratiladi. Individual tahlilda badiiy matn bilan tanishib chiqilgach, o’qituvchi har bir o’quvchiga alohida topshiriq beradi va talaba darslikdan foydalangan holda o’sha topshiriqni bajarish uchun alohida tahlil bilan shug‘ullanadi. Masalan, Cho’lponning "Go’zal" she'ri o’rganilayotganda, o’qituvchi bolalardan biriga she'rda istioradan qanday foydalanganligini, boshqasiga, o’xshatish qanday tasarruf etilganligini, uchinchisiga esa, mubolag‘aning qay tarzda o’rinli ishlatilganligini aniqlash va shu asosda matnni tahlil etishni topshirishi mumkin. Har bir bolaga tahlil uchun muayyan vaqt beriladi va tayyor bo’lgach, o’quvchi javobi tinglanadi. Guruhlarga ajratib tahlilga jalb etilgan o’quvchilarda musobaqa tuyg‘usi ustuvor o’rin tutadi. O’quvchilar qandaydir belgilarga ko’ra bir necha guruhga ajratiladi. So’ng guruhlarning har biriga asar tahliliga doir alohida topshiriq beriladi. Guruhlarga ajratishda o’tirgan O’rni, nasabnomlarning yonma-yon kelishi, jinsi va h.k. belgilar asos bo’lishi mumkin. Eng muhimi, guruhlarda ishchanlik ruhi hukmron bo’lishiga erishish va har guruhda boshqalarni o’z ortidan ergashtira oladigan o’quvchilarning bo’lishini ta'minlash kerak bo’ladi. Xayolot olami keng,tafakkuri uchqur bo’lgan o’quvchilar badiiy matndan, ko’pincha, o’qituvchi ham payqamay qolgan jihatlarni topishadi. Bir necha kishilik guruh o’quvchilarni birlashtiradi, fikrlar olishuviga o’rgatadi, birisining hissiyoti o’zgasida tuyg‘u uyg‘otadi. Shu zaylda badiiy matn yaxshiroq idrok etiladi. Bu xildagi tahlilda o’quvchilar boshqa guruhdagilarga savol berishlari mumkin. Guruh a'zolarining hammasiga bir xil baho qo’yish esa jiddiy tarbiyaviy ahamiyat kasb etadi. Chunki javobni kim qilgan bo’lsa-da, aslida u jamoa mehnatining mahsuli. Shu sabab, guruhdagilarning hammasiga bir xil baho qo’yish maqsadga muvofiq. Abdulla Qodiriyning "Mehrobdan chayon" romani o’rganilayotganda o’quvchilarini to’rt guruhga ajratish va matn bilan tanishib chiqilgach, uchinchi soatda bu guruhlardan biriga Anvar va Xudoyorxon obrazlarini o’rganish hamda matnga tayanilgan holda ularga xos xususiyatlar haqida to’xtalish, ikkinchisiga Ra'no tabiatidagi jasurlik va hissiyotga beriluvchanlik sifatlarining sabablarini asoslash, boshqasiga esa, Qobilboy va uning do’stlariga xos sifatlar, Sultonalining insoniy fazilatlari matnda qanday ko’rsatilganligini aniqlash, to’rtinchi guruhdagi bolalarga esa, Anvar bilan mulla Abduraxmon to’qnashuvi manzarasida personajlar holati ularning tilida qanchalik aks etganligini aniqlash topshiriladi. Topshiriqlar badiiy matn puxta o’rganilgandan keyin berilgani uchun ham uni bajarish bolalardan ko’p vaqt talab qilmaydi. Darslik-majmuadagi parcha bilan yana bir tanishish mobaynida har bir guruh a'zosi o’zlariga berilgan topshiriqqa daxldor jihatlarni kashf etishadi. Bu xildagi tahlil turini biror adib ijodi o’rganib bo’lingach, yakunlovchi mashg‘ulot tarzida uyushtirish yaxshi samara beradi. Adabiyot o’qitish tajribasida ko’proq qo’llaniladigan tahlil turi ommaviy (frontal) tahlildir. Bunda ko’proq o’qituvchi ishlaydi. O’quvchilar tahlil jarayonida o’qituvchi fikrlari tizginini yo’qotib qo’ymaslik va chalg‘ib qolmaslik uchun e'tibor bilan tinglaydilar. Shuni aytish kerakki, adabiyot darslarida o’quvchilarning jimgina o’tirib, miriqib dars tinglashi o’qituvchi muvaffaqiyatidan dalolat emas. O’qituvchi o’quvchi ruhiy muvozanatini buzishi, uni o’ylashga,tuyg‘ular girdobiga tushishga majbur etishi kerak. Qanchalik jarangdor, yoqimli, ravon va savodli bo’lmasin, o’qituvchi monologi adabiyot darsi oldiga qo’yilgan vazifalarni bajarishga yetarli bo’la olmaydi. O’qituvchi hamma va har bir bola bilan aloqa o’rnata bilganda, ularning fikri va yuragiga chug‘ tashlay olgandagina, bolalar ma'naviyatiga ta'sir ko’rsatadi. Buning uchun pedagogik dialog zarur. Adabiy ta'limda dialog monologdan qadrliroqdir. Shuning uchun ham o’zi ko’p ishlagan o’qituvchi emas, balki o’quvchilarini ko’proq ishlatishga erishgan o’qituvchi mohir pedagog hisoblanadi. Monolog darsning umri qisqa bo’ladi, uning ta'siri qo’ngiroq chalinishi bilan tugaydi va o’quvchilarning qalbida ham, tafakkurida ham chuqur iz qoldirmaydi. Yaxshi uyushtirilgan o’quv tahlili ana shu holatga barham beradi. Monologni kamida dialogga, imkoni bo’lsa, polilogga aylantiradi. Dars ko’pchilik faol ishtirok etadigan, ma'naviy qadriyatlar, mantiqiy sillogizmlar to’qnash keladigan jarayonga aylanadi. To’g‘ri uyushtirilgan frontal tahlil o’quvchilarni badiiy matn qatiga kirishga undaydi. Yaxshi o’quv tahlili asar muallifining vaqtlar osha va odam bilan qilgan suhbatidir. Ommaviy tahlil samarali bo’lishi uchun adabiyot o’qituvchisi darslik hamda undagi savol va topshiriqlardan yaxshi foydalana olishi kerak. Bundan tashqari, har bir o’qituvchi o’quvchilarning tayyorgarlik va ruhiy-aqliy darajasi hisobga olib tuzilgan, talabalarni izlanishga undaydigan hamda tahlilga chuqurroq kirishishga chorlaydigan o’z savol-topshiriqlar tizimiga ega bo’lishi kerak. Bu tizim o’qituvchining o’zi tomonidan ishlab chiqilishi ham mumkin, ilg‘or hamkasblarning zahirasidan olinishi ham mumkin. Badiiy asarni bitgan yozuvchining vakolatini olib ish ko’rayotgan o’qituvchi ijodkor bilan o’quvchini uchrashtiradigan, muloqotga kirishtiradigan insondir. Didaktik tahlilning bir qoidasi borki, unga amal qilmaslik adabiy ta'limni boshi berk ko’chaga kiritadi. Bu oltin qoida shundan iboratki, qanday janrda yozilganligi, qancha hajmda ekanligi va qanday o’rganilayotganligidan qat'i nazar, o’qituvchi badiiy asar mazmunini so’zlab berishi mumkin emas. Afsuski, adabiy ta'lim amaliyotida o’quv tahlilini badiiy asar mazmunini so’zlab berish tarzida tushunish juda keng yoyilgan. Holbuki, o’rganilayotgan asar mazmunini qayta hikoyalashning adabiy ta'lim maqsadiga mutlaqo aloqasi yo’q. Chunki chinakam badiiy asar uchun undagi voqealarning o’zi emas, balki o’sha voqealar ro‘y berishi mobaynida qahramonlar ruhiyatidagi po’rtanalar manzarasining aks ettirilgani muhimdir. Buning ustiga, ko‘pchilik asl badiiyat namunalarida biz ko‘nikkan ma'nodagi qayta hikoyalash mumkin bo’lgan mazmunning o’zi yo’q. Qayta hikoyalash mumkin bo’lgan joyda san'at bo’lmaydi. San'atning san'atligi, ilohiyligi, ijodligi, takrorlanmasligi ham, aynan, uni aytib berish mumkin emasligidadir. Kim bo‘lsa ham, boshqa birov tomonidan aytib berishga urinish badiiy asarni yo’qqa chiqarish demakdir. Navoiy tasvirlagan manzarani yoki Qodiriyning nozik ifodalarini ulardan boshqa biror kishi adiblar erishgan badiiy effektga erishtiradigan tarzda aytib bera olmaydi. Adabiyot darslarida o’qituvchilarning asosiy vaqti asardagi voqealarni talabalarga aytib berish bilan, o’quvchilarning barcha vaqti esa, muallimlaridan eshitganlarini qayta hikoyalash bilan o’tayotganligi uchun ham bizda kitob o’qish madaniyati pasayib bormoqda. Chunki maktab adabiy ta'limida o’quvchilar badiiy asarni emas, undagi voqealarni "uqishga o’rgatilgan". Adabiy asarlarni didaktik tahlil qilishda tayanilishi zarur bo’lgan bir qator tamoyillar mavjudki, ularga amal qilmay turib, adabiyot o’qitishda samaraga erishish mumkin emas. Ta'kidlash kerakki, o’quv tahlilida ham xuddi filologik tahlilda amal qiladigan tamoyillar o’z kuchida qoladi. Lekin o’quv tahlili pedagogik faoliyat bo’lganligi uchun ham bir necha o’ziga xos tamoyillarga ham